1Ti 1 | DOB | STEP | Kagutoki Timoti. 'Imu leta gete 'eguyega 'iweewa. 'Ada To'etoseyana nina Yaubada be Yesu Keliso 'idi loinega, Keliso manuna yaetosimana, manuna Keliso 'ena taemiemisa 'ada 'etoseyana manuna.

1 Timothy 1

Lokagutoki

1 Kagutoki Timoti. 'Imu leta gete 'eguyega 'iweewa. 'Ada To'etoseyana nina Yaubada be Yesu Keliso 'idi loinega, Keliso manuna yaetosimana, manuna Keliso 'ena taemiemisa 'ada 'etoseyana manuna. 2 'Oyo lowa Keliso 'uemisena 'enega ya'awa natuna 'ai'ailemu. Tamada Yaubada be 'ida 'Inapwana Yesu Keliso sida obobomeyo, be wate sida 'atenuwa 'ole'oleyeyo, be 'enega ma imu gwausowala 'uda miya bobo'ana.

Loguguya kabokabo manuna

3 Lowa tuta nina ni'atu be yapilisineyo be yatatauya Masidonia, ta yaemataluwemu, yagwae, “Geya'abo 'utautauya. Bada tuga Epeso 'ena 'uda miyami be 'aina tomota 'u'etobodedi be geya'abo mali e'itao sie'ie'itaedi, 4 ta wate geya'abo siemwaemwasala be si'ina'inana gimi 'epata tomota 'adi esanao, 'abona nai egewagewana 'emiya 'iapwesa, manuna memebala nidi tomota 'idi emisa Yaubada 'ena geya'abo silemelemedi.”

5 Gete 'igu loina be 'enega 'atemi 'esasedi 'ediyega taumimo waeobooboboma 'ai'aila, be wanuwanuwa bobo'ana, be waemisa 'ai'aila Keliso 'ena.

6 'Aina tomota emisa gete siguitoyasena, ga ona besobesoega ni'atu sikwani. 7 Nuwanuwadi be Yaubada 'ina loinao sie'itaedi, ta 'idi onao be 'idi loguguyao 'aledi nigeya simwalamwalatonidi.

8 Ona'ai'aila, loina nidi 'ebe lema bobo'ana, 'eguma tamuliya 'ai'ailedi. 9 Manuna loina nidi Yaubada nigeya 'isa'usa'udi topalupaludi manudi, ta esi tole'oa loina be tooopa'ala manudi, taudi nigeya Yaubada sida 'amayabena, be toto'umalidi, baibailidi, to'awasewa, taudi sinadiyao be tamadiyao be mali tomota 'adi toloemwawasao, 10 wate toloelatao, be taudi me'olotodi 'oloto siyadiyao 'ediya siloeloelata, be tomota 'adi to'ipwalao, ta to'awakabokabo, tosawatamatamana kabokabo, be wate e'ita palupaluna 'ana tole'oao maibo'adi. 11 Ta e'ita palupaluna nina Yaubada 'enega, tauna maedana be gwausowala 'aledi, ga 'igu paisewa 'i'ebwa'eguya be tetelina yaloguguyae tomota 'ediya.

Yaubada 'ina oboboma manuna

12 Ta wate 'ida 'Inapwana Yesu Keliso 'igiewaiwaiyegu 'igu paisewa gete manuna, 'enega 'ena yalokagutoki, manuna 'iemisegu, ga paisewa nina 'i'ebwa'egu. 13 Tuta lowa nigeya nadigega, manuna tuta nina 'ena Keliso ya'awa to'umaliyena ta 'ina bodao yaetalauwaledi, ta tuwa tuga Yaubada 'imwalatonina 'aene yage nidi to'umalidi yaguinuwedi taugu 'igu emwagemwageyega, ta wate nigeya yaemiemise, 'enega 'i'atenuwa 'ole'oleyegu, 14 ga 'ida 'Inapwana nina 'ioboboma 'ai'ailigu, ga emisa be oboboma Yesu Keliso 'enega 'i'ebwa'egu.

15 Ona gete ona 'ai'aila, ta 'ilobwenena be taemise, manuna Yesu Keliso ni'atu bale'uya 'imai toto'umalidi sabi 'etoseyedi, ta toto'umalidi maibo'adi 'ediyega 'abo'agu toto'umali wawasae.

16 Yaubada 'ina 'atenuwa'ole'ole 'eguya 'alena gete, 'aene Yesu Keliso 'abo'agu toto'umalina sinabwana manugu 'ie'alama'i'ita, be 'enega toto'umalina maibo'adi sida 'itagu be sida mwalatoni 'aene taudi wate, 'abo Keliso siemise, yawasidi ataya sida loba. 17 'Enega Yaubada tada 'amayabe be tada tupu atae, manuna taunamo Yaubada 'ai'aila, nigeya sawesawenaya be maninina ta'ita, nai 'imwamwawasa, ta 'ina loina 'edaya geya'abo 'igumwagumwala. Eimeni.

18 Natugu Timoti, 'unuwa'i'isi lowa Yaubada 'ina tosimanao 'imu guinuwa Yaubada manuna sigimi simanena, ta 'abo'agu wate 'igu loina gete 'emuya be 'uda etapewa Yaubada 'ina guinuwa manuna, 19 ma imu emisa waiwaina ta ma imu nuwanuwa bobo'ana, tuta maibo'ana 'ediya. Manuna 'aina gosedao nuwanuwa bobo'ana siguitoyasena, 'enega 'idi emisa 'ineneta ga sibe'u. 20 Tobe'u nidi 'ebweu 'ana esana Aimenio, ta 'ebweuna wate 'ana esana Alekisana. Siteluwa nidi ni'atu Seitani 'ena ya'ebwayaedi be 'iemata sabuyedi, be nuwadi 'ida sabwalena 'aene geya'abo 'ida 'Inapwana 'ana esana si'awa'awa to'umaliye.